关于管理华潘省婚礼、拴线祝福仪式、宴会及各类传统节庆活动的决定

ຈຸດປະສົງ ເພື່ອກຳນົດຫຼັກການ, ລະບຽບການ ແລະ ມາດຕະການໃນການຄຸ້ມຄອງງານແຕ່ງດອງ, ງານບາສີສູ່ຂວັນ, ງານລ້ຽງ ແລະ ງານບຸນປະເພນີຕ່າງໆຢູ່ພາຍໃນແຂວງຫົວພັນ, ແນໃສ່ເຮັດໃຫ້ການໃຊ້ຈ່າຍແບບປະຢັດມັດທະຍັດ, ຕ້ານການຟູມເຟືອຍ ຮັບປະກັນທາງດ້ານຊີວິດ, ສຸຂະພາບ, ປົກປັກຮັກສາຮີດຄອງປະເພນີອັນດີງາມທີ່ເປັນມູນເຊື້ອ ຂອງຊາດ, ບັນດາເຜົ່າ, ປົກປັກຮັກສາຄວາມສະຫງົບ, ຄວາມເປັນລະບຽບຮຽບຮ້ອຍໃນທ້ອງຖິ່ນແຂວງຫົວພັນ; ປະກອບສ່ວນເຂົ້າໃນການພັດທະນາເສດຖະກິດ, ວັດທະນະທຳ-ສັງຄົມ.

ການຄຸ້ມຄອງການຈັດງານແຕ່ງດອງ, ງານບາສີສູ່ຂວັນ, ງານລ້ຽງ ແລະ ງານບຸນປະເພນີຕ່າງໆ ການຄຸ້ມຄອງການຈັດງານແຕ່ງດອງ, ງານບາສີສູ່ຂວັນ, ງານລ້ຽງ ແລະ ງານບຸນປະເພນີຕ່າງໆແມ່ນການກຳນົດ ຮູບແບບ, ວິທີການ ແລະ ມາດຕະການໃນການຈັດງານປະເພດຕ່າງໆ ໃຫ້ສອດຄ່ອງກັບກົດໝາຍ, ລະບຽບການ, ຮີດຄອງປະເພນີອັນດີງາມຂອງຊາດ, ຂອງເຜົ່າ, ຮັບປະກັບການປະຫຍັດມັດທະຍັດ ແລະ ຕ້ານການຟູມເຟືອຍ.

ອະທິບາຍຄຳສັບ. 1. ງານແຕ່ງດອງ ໝາຍເຖິງ ພິທີການຢັ້ງຢືນໃນການສ້າງຄອບຄົວໃໝ່ ເພື່ອໃຫ້ການຈັດຕັ້ງ, ບຸກຄົນ, ນິຕິບຸກຄົນ ຮັບຮູ້ວ່າ ຄູ່ບ່າວສາວ ໄດ້ເປັນຄູ່ຜົວເມຍກັນ ໂດຍຖືກຕ້ອງຕາມລະບຽບກົດໝາຍ ແລະ ຮີດຄອງປະເພນີ; 2. ງານບາສີສູ່ຂວັນ ໝາຍເຖິງ ພິທີສູ່ຂວັນ, ຜູກແຂນ ແລະ ໃຫ້ພອນເຊິ່ງກັນ ແລະ ກັນ ທີ່ຈັດຂຶ້ນໂດຍ ບຸກຄົນ, ນິຕິບຸກຄົນ, ອົງການຈັດຕັ້ງຕ່າງໆ ເພື່ອຄວາມເປັນສິລິມຸງຄຸນ ແລະ ເປັນການຮັບໂຊກໄຊ; 3. ງານລ້ຽງ ໝາຍເຖິງ ງານທີ່ຈັດຂຶ້ນເພື່ອເປັນການພົບປະສ້າງສັນ, ຮັບປະທານອາຫານ, ການດື່ມເນື່ອງ ໃນໂອກາດວັນສຳຄັນຕ່າງໆ; 4. ງານບຸນປະເພນີ ໝາຍເຖິງ ງານເທດສະການ, ງານບຸນຮີດຄອງປະເພນີຕ່າງໆທີ່ເຄີຍນັບຖື ແລະ ປະຕິບັດສືບທອດກັນຕໍ່ໆກັນມາຂອງປະຊາຊົນບັນດາເຜົ່າ; 5. ການຄຸ້ມຄອງ ໝາຍເຖິງ ການກຳນົດເອົາຮູບແບບລະບຽບການໃດໜຶ່ງເພື່ອຈັດຕັ້ງປະຕິບັດໃຫ້ສອດຄ່ອງກັບແນວທາງນະໂຍບາຍທີ່ວາງອອກເພື່ອຈຸດປະສົງໃດໜຶ່ງ; 6. ຜູ້ບໍລິໂພກ ໝາຍເຖິງ ຜູ້ຊົມໃຊ້, ຜູ້ກິນ ແລະ ຜູ້ໃຊ້ຈ່າຍຕ່າງໆ; 7. ອຸປະໂພກ ໝາຍເຖິງເຄື່ອງໃຊ້ໃຫ້ເກີດປະໂຫຍດ; 8. ພລາສຕິກ ໝາຍເຖິງ ວັດຖຸທີ່ເປັນຢາງສາມາດບັນຈຸ ແລະ ຫຸ້ມຫໍ່ອາຫານໄດ້; 9. ປະຢັດມັດທະຍັດ ໝາຍເຖິງ ການນຳໃຊ້ງົບປະມານ ແລະ ຊັບສິນຂອງບຸກຄົນ, ນິຕິບຸກຄົນ, ການຈັດຕັ້ງລັດ, ແຮງງານ, ເວລາລັດຖະການ, ພະລັງງານ ແລະ ອື່ນໆ ທີ່ມີຢູ່ຢ່າງຈຳກັດໃຫ້ມີປະສິດທິຜົນສູງສຸດ; 10. ຟູມເຟືອຍ ໝາຍເຖິງ ການນຳໃຊ້ງົບປະມານ ແລະ ຊັບສິນຂອງບຸກຄົນ, ການຈັດຕັ້ງລັດ, ແຮງງານ, ເວລາທາງລັດຖະການ, ພະລັງງານອື່ນໆເກີນກຳນົດ ແລະ ມາດຖານທີ່ໄດ້ກຳນົດໄວ້ຢ່າງບໍ່ມີປະສິດທິຜົນ; 11. ເດຊີເບວ (decibel) ໝາຍເຖິງ ຫົວໜ່ວຍວັດແທກຄວາມດັງຂອງສຽງ.

ນະໂຍບາຍຂອງລັດຕໍ່ການຄຸ້ມຄອງງານແຕ່ງດອງ, ງານບາສີສູ່ຂວັນ, ງານລ້ຽງ ແລະ ງານບຸນປະເພນີຕ່າງໆ ລັດຊຸກຍູ້, ສົ່ງເສີມໃຫ້ແກ່ບຸກຄົນ, ນິຕິບຸກຄົນ ແລະ ການຈັດຕັ້ງທຸກພາກສ່ວນ ໃຫ້ເປັນເຈົ້າການໃນການ ຄຸ້ມຄອງການຈັດຕັ້ງງານແຕ່ງດອງ, ບາສີສູ່ຂວັນ, ງານລ້ຽງ ແລະ ບຸນປະເພນີຕ່າງໆ ໃຫ້ໄດ້ຄວາມໝາຍຄວາມ ສຳຄັນທາງດ້ານເນື້ອໃນ, ຈຸດປະສົງ ແລະ ເປົ້າໝາຍຂອງງານຢ່າງຄົບຖ້ວນ, ຖືກຕ້ອງ, ສອດຄ່ອງກັບກົດໝາຍ, ລະບຽບການ ແລະ ຮີດຄອງປະເພນີອັນດີງາມຂອງຊາດ, ຂອງເຜົ່າ, ເຮັດແບບກະທັດຮັດບໍ່ໃຫຍ່ໂຕເກີນຄວນ ແລະ ບໍ່ຟູມເຟືອຍທາງດ້ານຊັບສິນເງິນຄຳ, ວັດຖຸອຸປະກອນ, ແຮງງານ ແລະ ເວລາ.

ຫຼັກການກ່ຽວກັບການຄຸ້ມຄອງການຈັດງານແຕ່ງດອງ, ບາສີສູ່ຂວັນ, ງານລ້ຽງ ແລະ ງານບຸນປະເພນີຕ່າງໆ . ຫຼັກການກ່ຽວກັບການຄຸ້ມຄອງການຈັດງານແຕ່ງດອງ, ບາສີສູ່ຂວັນ, ງານລ້ຽງ ແລະ ງານບຸນປະເພນີຕ່າງໆມີ: 1. ຮັບປະກັນຄວາມຖືກຕ້ອງ, ສອດຄ່ອງກັບແນວທາງນະໂຍບາຍຂອງພັກ, ລະບຽບກົດໝາຍຂອງລັດ ແລະ ຮີດຄອງປະເພນີອັນດີງາມຂອງຊາດ, ຂອງທ້ອງຖິ່ນ ແລະ ບັນດາເຜົ່າ; 2. ຮັບປະກັນຄວາມໂປ່ງໃສ, ເປີດເຜີຍ, ມີການປະສານງານກັບບັນດາພາກສ່ວນກ່ຽວຂ້ອງ ແລະ ຕິດຕາມ ກວດກາໄດ້; 3. ຮັບປະກັນການປະຢັດມັດທະຍັດ, ຕ້ານການຟູມເຟືອຍ; 4. ຮັບປະກັນຄວາມປອດໄພທາງດ້ານຊັບສິນ, ຊີວິດ, ສຸຂະພາບ ແລະ ຄວາມເປັນລະບຽບຮຽບຮ້ອຍ ຂອງສັງຄົມ ແລະ ສິ່ງແວດລ້ອມ; 5. ຮັບປະກັນຄວາມສາມັກຄີ, ຄວາມເປັນເອກະພາບ ແລະ ສະເໝີພາບ ຂອງປະຊາຊົນບັນດາເຜົ່າພາຍໃນ ແຂວງຫົວພັນ.

ຂອບເຂດການນຳໃຊ້ ຂໍ້ຕົກລົງສະບັບນີ້ ນຳໃຊ້ສຳລັບບຸກຄົນ, ນິຕິບຸກຄົນ, ບັນດາອົງການຈັດຕັ້ງລັດທຸກພາກສ່ວນທັງພາຍໃນ ແລະ ຕ່າງປະເທດ ທີ່ມີເປົ້າໝາຍຈັດງານແຕ່ງດອງ, ງານບາສີສູ່ຂວັນ, ງານລ້ຽງ ແລະ ງານບຸນປະເພນີຕ່າງໆ ຢູ່ ແຂວງຫົວພັນ. ພາກທີ 1[ ການຈັດງານແຕ່ງດອງ, ງານບາສີສູ່ຂວັນ, ງານລ້ຽງ ແລະ ງານບຸນປະເພນີຕ່າງໆ ໜວດທີ [! ການຈັດງານແຕ່ງດອງ

ພິທີການແຕ່ງດອງ ພິທີການແຕ່ງດອງຕາມຮີດຄອງປະເພນີຈະຈັດກ່ອນ ຫຼື ຫຼັງການຈົດທະບຽນການແຕ່ງດອງກໍໄດ້ແຕ່ບໍ່ໃຫ້ ມີຜົນສະທ້ອນທາງດ້ານກົດໝາຍ ; ຄູ່ບ່າວສາວຈະມີຖານະເປັນຄູ່ຜົວເມຍກັນນັບແຕ່ວັນທີ່ໄດ້ຈົດທະບຽນການແຕ່ງດອງເປັນຕົ້ນໄປ.

ການແຫ່ໃພ້ ແລະ ແຫ່ເຂີຍ ການແຫ່ໃພ້ ແລະ ແຫ່ເຂີຍໃຫ້ຈັດແບບງ່າຍດາຍ, ກະທັດຮັດ, ມ່ວນຊື່ນຕາມປະເພນີ ແລະ ແຫ່ດ້ວຍການ ຍ່າງ ຫຼື ນຳໃຊ້ພາຫະນະຕາມຄວາມເບນາະສົມ ແຕ່ບໍ່ໃຫ້ສ້າງຄວາມຫຍຸ້ງຍາກ ແລະ ກີດຂວາງການສັນຈອນຕາມ ທ້ອງຖະຫົນ.

ພິທີຜູກແຂນຄູ່ຜົວເມຍໃໝ່ ການຜູກແຂນຄູ່ຜົວເມຍໃໝ່ໃຫ້ປະຕິບັດຕາມຮີດຄອງປະເພນີຂອງບັນດາເຜົ່າທີ່ເຄີຍສືບທອດກັນມາ, ເຊິ່ງຈະຈັດຢູ່ເຮືອນເຈົ້າບ່າວ, ເຈົ້າສາວ ຫຼື ສະຖານທີ່ອື່ນໆກໍໄດ້ ຕາມຄວາມເໝາະສົມ, ອາດຈະຕົບແຕ່ງ ປະດັບປະດາເອ້ຢ້ອງດ້ວຍດອກໄມ້ ຫຼື ວັດຖຸອື່ນໆ ແລະ ມີພາເຂົ້າ, ພາຂວັນ, ຂັນໝາກເບັງ, ວັດຖຸສິ່ງຂອງທີ່ ເປັນສິລິມຸງຄຸນຕ່າງໆ ແລະ ມີພໍພອນເພື່ອທຳພິທີໃຫ້ພອນແກ່ຄູ່ບ່າວສາວຕາມຮີດຄອງປະເພນີ.

ສະຖານທີ່ ແລະ ພາເຂົ້າໃນງານແຕ່ງດອງ ສະຖານທີ່ຈັດງານແຕ່ງດອງ ອາດຈະຈັດຂຶ້ນຢູ່ເຮືອນເຈົ້າບ່າວ, ເຈົ້າສາວ ຫຼື ສະຖານທີ່ອື່ນກໍໄດ້ ແລ້ວແຕ່ ຄວາມສະດວກຂອງເຈົ້າພາບ, ແຕ່ສະຖານທີ່ຕ້ອງໃຫ້ພຽງພໍໃນການຮັບຮອງແຂກທີ່ມາຮ່ວມງານດອງ ແລະ ບໍ່ໃຫ້ ແອອັດຈົນເກີນໄປ: ພາເຂົ້າໃນງານແຕ່ງດອງ ອາດຈະຈັດເປັນພາເຂົ້າ ຫຼື ເປັນໂຕະອາຫານ(ໂຕະຍາວ, ໂຕະສີ່ຫຼຽມ ໂຕະມົນ ຫຼື ຮູບແບບອື່ນໆ) ກໍໄດ້ຕາມຄວາມເໜາະສົມ; ສ່ວນອາຫານອາດຈະປະກອບມີຫຼາຍປະເພດ ຕາມຈຸດປະສົງຂອງ ເຈົ້າພາບ ແຕ່ຕ້ອງຮັບປະກັນໃຫ້ຖືກຕາມຫຼັກອານາໄມ, ປອດໄພຕໍ່ຊີວິດ, ສຸຂະພາບຂອງຜູ້ບໍລິໂພກ, ອາຫານອາດ ຈະຫຸ້ມທໍ ຫຼື ບັນຈຸດ້ວຍວັດຖຸທຳມະຊາດ ຫຼື ວັດຖຸອື່ນໆ ທີ່ບໍ່ສົ່ງຜົນກະທົບຕໍ່ຜູ້ບໍລິໂພກ.

ການຕ້ອນຮັບແຂກໃນງານແຕ່ງດອງ ກ່ອນແຂກທີ່ຖືກເຊີນຈະເຂົ້າຮ່ວມໃນງານ ເຈົ້າພາບຕ້ອງໄດ້ກະກຽມສະຖານທີ່, ອາຫານ, ເຄື່ອງດື່ມ ແລະ ສິ່ງອື່ນໆໃຫ້ຄົບຖ້ວນ ແລະ ຕ້ອນຮັບແຂກ, ຈັດແຂກເຂົ້າຮ່ວມພາເຂົ້າໃນງານດອງ ຕາມຄວາມເໝາະສົມ; ເມື່ອ ຮອດເວລາຕາມການນັດໝາຍ ຄູ່ບ່າວສາວ, ພໍ່ແມ່, ເຖົ້າແກ່ ແລະ ຕາງໜ້າເຈົ້າພາບທັງສອງຝ່າຍ ຂຶ້ນສູ່ເວທີເພື່ອ ກ່າວການຕ້ອນຮັບ, ຂອບໃຈແຂກທີ່ມາຮ່ວມງານແຕ່ງດອງ ແລະ ເຊີນຮັບປະທານອາຫານ; ການກ່າວຕ້ອນຮັບແຂກນັ້ນຕ້ອງໃຫ້ມີເນື້ອໃນສັ້ນ, ກະທັດຮັດ, ເປັນສິລິມຸງຄຸນແກ່ຄູ່ສ້າງຄອບຄົວໃໝ່ ແລະ ແຂກທີ່ມາຮ່ວມໃນງານ.

ການນຸ່ງຖືໃນງານແຕ່ງດອງ ເຈົ້າພາບ, ເຈົ້າບ່າວ, ເຈົ້າສາວ ແລະ ແຂກຖືກເຊີນ ທີ່ມາຮ່ວມໃນງານແຕ່ງດອງ ຕ້ອງນຸ່ງຖືສຸພາບຮຽບ ຮ້ອຍ ຕາມວັດທະນະທຳຂອງລາວເຊັ່ນ: ເພດຍິງນຸ່ງສິ້ນ, ເສື້ອແພໄໝ ຫຼື ເສື້ອສຸພາບ ແລະ ເພດຊາຍນຸ່ງໂສ້ງຂາ ຍາວ, ເສື້ອແພໄໝ, ເສື້ອສຸພາບ, ຊຸດສາກົນ ຫຼື ອາດຈະນຸ່ງຕາມເອກະລັກວັດທະນະທຳຂອງເຜົ່າກໍໄດ້.