ຄຳສັ່ງຂອງນາຍົກລັດຖະມົນຕີ ກ່ຽວກັບການເອົາໃຈໃສ່ໂຄສະນາເຜີຍແຜ່, ສຶກສາອົບຮົມສ້າງສະຕິເຄົາລົບກົດໝາຍ (ສະບັບເລກທີ 38/ນຍ, ລົງວັນທີ 17.10.2007)

ມາດຕາ 1

ອີງຕາມມາດຕາ 12 ຂອງກົດໝາຍວ່າດ້ວຍລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ (ສະບັບເລກທີ 02/ສພຊ, ວັນທີ 6 ພຶດສະພາ 2003); ອີງຕາມມາດຕາ 8 ຂອງຄຳສັ່ງຂອງປະທານປະເທດ (ສະບັບເລກທີ 02/ປທ, ວັນທີ 20 ຕຸລາ 2003) ວ່າດ້ວຍການອ້າງອີງກົດໝາຍ. ນັບແຕ່ປີ 1989-90 ເປັນຕົ້ນມາ, ປະເທດເຮົາໄດ້ຫັນແນວທາງນະໂຍບາຍປ່ຽນແປງໃໝ່ຂອງພັກ ໄປເປັນລັດຖະທຳມະນູນ, ກົດໝາຍ ແລະ ບັນດານິຕິກຳຫຼາຍສະບັບ ເພື່ອໃຊ້ເປັນເຄື່ອງມືໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ. ແຕ່ວ່າ ແນວທາງ, ແຜນງານ, ນະໂຍບາຍຂອງພັກ, ລັດຖະທຳມະນູນ, ກົດໝາຍ ແລະ ບັນດານິຕິກຳຂອງລັດ ບໍ່ວ່າຈະສົມບູນ, ຖືກຕ້ອງ ແລະ ເໝາະສົມພຽງໃດກໍຕາມ, ຖ້າເອກະສານເຫຼົ່ານີ້ບໍ່ໄດ້ຮັບການເຜີຍແຜ່ຢ່າງກວ້າງຂວາງໃຫ້ທົ່ວສັງຄົມຮັບຮູ້ ແລະ ເຂົ້າຮ່ວມປະຕິບັດຢ່າງມີປະສິດທິຜົນ ກໍຈະກາຍເປັນເອກະສານທີ່ບໍ່ມີຄຸນຄ່າ ແລະ ບໍ່ມີຄວາມໝາຍ. ສະນັ້ນ, ການເອົາໃຈໃສ່ເຜີຍແຜ່ກົດໝາຍ ແລະ ສຶກສາອົບຮົມຈິດສຳນຶກໃນການປະຕິບັດຕາມກົດໝາຍ ແມ່ນຄວາມຮຽກຮ້ອງຕ້ອງການອັນຮີບດ່ວນຂອງສະພາບການຕົວຈິງໃນປັດຈຸບັນ. ໃນໄລຍະຜ່ານມາ, ວຽກງານການເຜີຍແຜ່, ການສຶກສາອົບຮົມ, ການປະຕິບັດ ແລະ ການກວດກາການຈັດຕັ້ງປະຕິບັດກົດໝາຍ ໄດ້ຮັບຄວາມເອົາໃຈໃສ່ໃນລະດັບໜຶ່ງຈາກບັນດາຂະແໜງການ ແລະ ອົງການປົກຄອງທ້ອງຖິ່ນທຸກຂັ້ນ, ເຮັດໃຫ້ປະຊາຊົນມີຄວາມຮູ້ ແລະ ຄວາມເຂົ້າໃຈກ່ຽວກັບກົດໝາຍນັບມື້ນັບສູງຂຶ້ນ, ຈິດສຳນຶກໃນການປະຕິບັດຕາມກົດໝາຍນັບມື້ນັບເຂັ້ມແຂງຂຶ້ນ, ໄດ້ປະກອບສ່ວນເຮັດໃຫ້ສັງຄົມມີຄວາມສະຫງົບ ແລະ ມີລະບຽບຮຽບຮ້ອຍໃນລະດັບໜຶ່ງ. ແຕ່ພ້ອມກັນນັ້ນ, ກໍຕ້ອງເຫັນວ່າ ຍັງມີຫຼາຍຂະແໜງການ ແລະ ທ້ອງຖິ່ນ ທີ່ຍັງບໍ່ທັນເອົາໃຈໃສ່ວຽກງານນີ້ຢ່າງຖືກຕ້ອງ, ບໍ່ທັນຖືວ່າເປັນໜ້າທີ່ການເມືອງຂອງຕົນ, ແຕ່ໄປອາໄສໃຫ້ຂະແໜງການອື່ນດຳເນີນການເຜີຍແຜ່ກົດໝາຍ ແລະ ສຶກສາອົບຮົມຈິດສຳນຶກໃນການປະຕິບັດຕາມກົດໝາຍ ແທນຂະແໜງການ ແລະ ທ້ອງຖິ່ນຂອງຕົນ, ເຮັດໃຫ້ການເຄື່ອນໄຫວສ້າງຈິດສຳນຶກໃນການປະຕິບັດຕາມກົດໝາຍໃຫ້ແກ່ສັງຄົມ ຍັງບໍ່ທັນເປັນຂະບວນການທີ່ແຜ່ຫຼາຍ, ຕໍ່ເນື່ອງ, ກວ້າງຂວາງ ແລະ ເລິກເຊິ່ງ, ບໍ່ທັນເຂົ້າເຖິງກຸ່ມເປົ້າໝາຍຕ່າງໆ, ເຊິ່ງເປັນໜຶ່ງໃນສາເຫດສຳຄັນທີ່ເຮັດໃຫ້ເກີດການກະທຳຜິດກົດໝາຍ.