ຄຳສັ່ງ ຂອງເຈົ້າແຂວງສະຫວັນນະເຂດ ກ່ຽວກັບການເພີ່ມທະວີຄຸ້ມຄອງວຽກງານອາຊີບ-ພາຫະນະພິເສດ

ມາດຕາ 1

ອີງຕາມ: ກົດໝາຍວ່າດ້ວຍວິສາຫະກິດ (ສະບັບປັບປຸງ) ສະບັບເລກທີ 46/ສພຊ, ວັນທີ 26 ທັນວາ 2013; ຄຳສັ່ງຂອງນາຍົກລັດຖະມົນຕີ ສະບັບເລກທີ 27/ນຍ, ວັນທີ 5 ຕຸລາ 2011 ວ່າດ້ວຍການເພີ່ມທະວີການສະກັດກັ້ນ ແລະ ແກ້ໄຂປະກົດການຫຍໍ້ທໍ້ໃນສັງຄົມ; ຂໍ້ຕົກລົງຂອງລັດຖະມົນຕີວ່າການກະຊວງປ້ອງກັນຄວາມສະຫງົບ ສະບັບເລກທີ 653/ປກສ, ວັນທີ 8 ພຶດສະພາ 2012 ວ່າດ້ວຍການຄຸ້ມຄອງອາຊີບພິເສດ - ເຄື່ອງມືພິເສດ; ມະຕິກອງປະຊຸມຄະນະປະຈຳສະພາປະຊາຊົນແຂວງ ສະບັບເລກທີ 11/ສພຂ, ວັນທີ 5 ກຸມພາ 2018. ໃນປັດຈຸບັນ, ປະກົດການຫຍໍ້ທໍ້ໃນສັງຄົມ ມີທ່າອ່ຽງເພີ່ມຂຶ້ນ, ມີຜົນກະທົບກວ້າງຂວາງ, ຕົ້ນຕໍແມ່ນບັນຫາຢາເສບຕິດ, ການປຸ້ນຈີ້, ຊິງຊັບ, ລັກຂະໂມຍ, ການນຳໃຊ້ອາວຸດທີ່ຜິດກົດລະບຽບ, ສະຖານທີ່ຊຸມນຸມ, ໄພພິບັດທາງສັງຄົມ, ການຄ້າມະນຸດ, ການຄ້າປະເວນີ, ແລະ ບັນຫາບຸກຄົນທັງພາຍໃນ ແລະ ຕ່າງປະເທດ ທີ່ບໍ່ສອດຄ່ອງກັບກົດໝາຍ ແລະ ລະບຽບການຂອງ ສາທາລະນະລັດ ປະຊາທິປະໄຕ ປະຊາຊົນລາວ. ເຖິງແມ່ນວ່າ ໃນໄລຍະຜ່ານມາ ພວກເຮົາໄດ້ສຸມໃສ່ການຄຸ້ມຄອງ ແລະ ດຳເນີນມາດຕະການແກ້ໄຂຢ່າງຕັ້ງໜ້າ ໃນຫຼາຍຮູບແບບ ແລະ ຫຼາຍວິທີການ, ໂດຍຜ່ານການອອກຄຳສັ່ງ, ຂໍ້ຕົກລົງ ຂອງອຳນາດການປົກຄອງທ້ອງຖິ່ນ ເພື່ອຄຸ້ມຄອງ ແລະ ກວດກາ, ແຕ່ກໍ່ຍັງມີເຫດການ ແລະ ປະກົດການຫຼາຍຢ່າງ ທີ່ເກີດຂຶ້ນໃນສັງຄົມ, ສົ່ງຜົນກະທົບຕໍ່ຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງສັງຄົມ, ຖ່ວງດຶງການພັດທະນາເສດຖະກິດ-ສັງຄົມຂອງຊາດ ແລະ ທ້ອງຖິ່ນ, ແລະ ສົ່ງຜົນກະທົບຕໍ່ບົດບາດ ແລະ ອິດທິພົນຂອງພັກ ແລະ ການຄຸ້ມຄອງຂອງລັດ, ໂດຍສະເພາະ ຜົນກະທົບຕໍ່ໜ້າທີ່, ສິດ ແລະ ໜ້າທີ່ຮັບຜິດຊອບ ໃນການຄຸ້ມຄອງ ແລະ ກວດກາຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງສັງຄົມ, ເປັນໂອກາດໃຫ້ຝ່າຍປໍລະປັກ ແລະ ຄົນຊົ່ວ ນຳໃຊ້ບັນຫາດັ່ງກ່າວ ສ້າງສະຖານະການທາງການເມືອງ ແລະ ໂຄສະນາບິດເບືອນ ຕໍ່ການນຳພາຂອງພັກ ແລະ ການຄຸ້ມຄອງຂອງລັດ-ສັງຄົມ. ເພື່ອໃຫ້ບຸກຄົນ ຫຼື ນິຕິບຸກຄົນ, ອົງການຈັດຕັ້ງຂອງລັດ ແລະ ເອກະຊົນ (ລວມທັງຄົນລາວ, ຄົນຕ່າງດ້າວ ແລະ ຄົນຕ່າງປະເທດ) ທີ່ດຳເນີນທຸລະກິດອາຊີບພິເສດ - ເຄື່ອງມືພິເສດ ຢູ່ໃນແຂວງ ດຳເນີນທຸລະກິດຕາມກົດໝາຍ ແລະ ລະບຽບການ, ເຈົ້າແຂວງ ສະຫວັນນະເຂດ ຈຶ່ງອອກຄຳສັ່ງສະບັບນີ້: