ຄຳສັ່ງແນະນຳ ວ່າດ້ວຍ ການເພີ່ມທະວີຄວາມເອົາໃຈໃສ່ໃນການຈັດຕັ້ງປະຕິບັດ ວຽກງານການຄຸ້ມຄອງສັດນ້ຳ ແລະ ສັດປ່າ ໃນຂອບເຂດທົ່ວປະເທດ

ມາດຕາ 1

ເຖິງ: ຫົວໜ້າກົມຊັບພະຍາກອນທຳມະຊາດ ແລະ ສິ່ງແວດລ້ອມ ປະຈຳແຂວງ, ນະຄອນຫຼວງວຽງຈັນ, ແລະ ຫົວໜ້າຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມ ປະຈຳທຸກເມືອງທົ່ວປະເທດ. ເລື່ອງ: ເພີ່ມທະວີການເອົາໃຈໃສ່ຈັດຕັ້ງປະຕິບັດວຽກງານຄຸ້ມຄອງສັດນ້ຳ ແລະ ສັດປ່າ ໃນຂອບເຂດທົ່ວປະເທດ. ອີງຕາມມາດຕາ 64 ຂອງພາກທີ 4/5 ແຫ່ງກົດໝາຍວ່າດ້ວຍສັດນ້ຳ ແລະ ສັດປ່າ ສະບັບເລກທີ 07/ສພຊ (ປະກາດໃຊ້ວັນທີ 24 ທັນວາ 2007). ອີງຕາມຄຳສັ່ງຂອງນາຍົກລັດຖະມົນຕີ ສະບັບເລກທີ 435/ນຍ (ວັນທີ 28 ພະຈິກ 2011) ວ່າດ້ວຍການຈັດຕັ້ງ ແລະ ການເຄື່ອນໄຫວຂອງກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ. ໃນໄລຍະຫຼາຍປີຜ່ານມາ, ເຫັນວ່າຫຼາຍທ້ອງຖິ່ນໄດ້ເອົາໃຈໃສ່ຢ່າງຈິງຈັງຕໍ່ການຄຸ້ມຄອງສັດນ້ຳ ແລະ ສັດປ່າໃນທ້ອງຖິ່ນຂອງຕົນ, ໂດຍການດຳເນີນການກວດກາໃນເຂດປ່າສະຫງວນແຫ່ງຊາດ, ເຂດປ່າປ້ອງກັນ, ເຂດດິນທາມ, ຕະຫຼາດ ແລະ ຮ້ານອາຫານ; ພ້ອມທັງດຳເນີນການເຜີຍແຜ່ ໂດຍການວາງລະບຽບການ, ການຫ້າມລ່າ ແລະ ຈັບສັດໃນໄລຍະທີ່ສັດປ່າ ແລະ ສັດນ້ຳຖືພາ, ອອກລູກ ແລະ ລ້ຽງລູກ; ແລະ ສະກັດກັ້ນການຄ້າສັດນ້ຳ ແລະ ສັດປ່າທີ່ຜິດກົດໝາຍ; ລະດົມປະຊາຊົນມອບປືນລ່າສັດ ແລະ ເຄື່ອງມືຫາປາແບບທຳລາຍລ້າງໃຫ້ແກ່ອຳນາດການປົກຄອງ, ເພື່ອການຄຸ້ມຄອງ ແລະ ນຳໃຊ້ທີ່ຖືກຕ້ອງຕາມລະບຽບການຂອງກົດໝາຍວ່າດ້ວຍສັດນ້ຳ ແລະ ສັດປ່າ. ຄຽງຄູ່ກັບດ້ານບວກດັ່ງກ່າວ, ຍັງພົບເຫັນວ່າບາງທ້ອງຖິ່ນຍັງມີປະກົດການລະເມີດກົດໝາຍ: ການຈຳໜ່າຍສັດນ້ຳ ແລະ ສັດປ່າທີ່ຖືກປົກປ້ອງຢູ່ຕະຫຼາດ ແລະ ຕາມເສັ້ນທາງຕ່າງໆ, ຍັງມີການລ່າສັດນ້ຳ ແລະ ສັດປ່າແບບລັກລອບ, ການໃຊ້ອາວຸດສົງຄາມ, ລະເບີດ, ຢາພິດ, ສານເຄມີ, ເຄື່ອງຊ໊ອກປາ ເພື່ອຫາປາ; ບາງທ້ອງຖິ່ນຍັງມີການລ່າຊ້າງປ່າແບບລັກລອບ, ການຈຳໜ່າຍສັດນ້ຳ ແລະ ສັດປ່າປະເພດຫ້າມລ່າ (ບັນຊີ 1) ແລະ ປະເພດຄຸ້ມຄອງ (ບັນຊີ 2) ຢູ່ຕະຫຼາດ ແລະ ຮ້ານອາຫານ ຢ່າງເປີດເຜີຍ ໂດຍບໍ່ເຄົາລົບກົດໝາຍ.