ຂໍ້ຕົກລົງວ່າດ້ວຍ ການຄຸ້ມຄອງ ແລະ ນຳໃຊ້ຊົນລະປະທານ ຢູ່ແຂວງ ອຸດົມໄຊ

ມາດຕາ ມາດຕາ 1

ມາດຕາ 3 ການອະທິບາຍຄຳສັບ
ຄຳສັບທີ່ນຳໃຊ້ໃນຂໍ້ຕົກລົງສະບັບນີ້ ມີຄວາມໝາຍ ດັ່ງນີ້:
1. ຊົນລະປະທານ ໝາຍເຖິງ ລະບົບການສະໜອງນ້ຳ ແລະ ການລະບາຍ ເພື່ອການຜະລິດກະສິກຳ ຊຶ່ງປະກອບດ້ວຍລະບົບຫົວງານ, ລະບົບຫົດ ປ້ອງກັນແລ້ງ ແລະ ລະບົບລະບາຍ ປ້ອງກັນນ້ຳຖ້ວມ;
2. ຫົວງານ ໝາຍເຖິງ ເຂື່ອນ, ອ່າງເກັບນ້ຳຊົນລະປະທານ, ຝາຍນ້ຳລົ້ນ, ທາງລະບາຍນ້ຳລົ້ນ, ຈັກສູບນ້ຳ, ໄດປ້ານ້ຳ, ປະຕູນ້ຳທີ່ສົ່ງຜ່ານອ່າງຜ່ອນກຳລັງນ້ຳ ສູ່ຄອງເຫຼືອງແມ່ ແລະ ເຮືອນຈັກໄຟຟ້ານ້ຳຕົກຂະໜາດນ້ອຍ;
3. ອ່າງເກັບນ້ຳຊົນລະປະທານ ໝາຍເຖິງ ພື້ນທີ່ເກັບນ້ຳທີ່ເກີດຂຶ້ນຈາກການກໍ່ສ້າງ ຫຼື ດັດແປງຈາກອ່າງນ້ຳທຳມະຊາດ, ເຂື່ອນ, ຝາຍນ້ຳລົ້ນ, ປະຕູນ້ຳ ແລະ ກໍ່ສ້າງໂຄງສ້າງອື່ນໆ ເພື່ອເກັບນ້ຳໄວ້ໃຫ້ແກ່ການຜະລິດກະສິກຳ, ຕ້ານແລ້ງ-ຕ້ານຖ້ວມ, ຄົມມະນາຄົມ, ການທ່ອງທ່ຽວ, ການປະມົງ, ອຸດສາຫະກຳ, ນ້ຳປະປາ ແລະ ຮັບໃຊ້ໃນການດຳລົງຊີວິດຂອງປະຊາຊົນ;
4. ຝາຍນ້ຳລົ້ນ ໝາຍເຖິງ ຝາຍທີ່ສ້າງຂຶ້ນຕັນແລວນ້ຳ ຫຼື ສາຍນ້ຳ ເພື່ອຍົກລະດັບໃຫ້ນ້ຳສູງຂຶ້ນ, ໄຫຼລົ້ນສັນຝາຍໄດ້ຕາມເຕັກນິກການອອກແບບ ແລະ ສາມາດໄຫຼເຂົ້າປະຕູນ້ຳປາກຄອງເຫຼືອງ ຕາມຄວາມຕ້ອງການ;
5. ລະບົບສົ່ງນ້ຳ ໝາຍເຖິງ ລະບົບຄອງເຫຼືອງ ແລະ ທໍ່ສົ່ງນ້ຳ, ເພື່ອສົ່ງນ້ຳເຂົ້າສູ່ພື້ນທີ່ການຜະລິດ ຊຶ່ງປະກອບມີຄອງເຫຼືອງແມ່, ຄອງເຫຼືອງຂັ້ນສອງ, ຄອງເຫຼືອງຂັ້ນສາມ, ຄອງຄັນນາຄູ່ ແລະ ອາຄານຕາມຄອງເຫຼືອງ;
6. ປະຕູນ້ຳ ໝາຍເຖິງ ປະຕູເປີດ-ປິດນ້ຳ ທີ່ສ້າງຂຶ້ນ ເພື່ອຄວບຄຸມປະລິມານການໄຫຼຂອງນ້ຳຈາກຫົວງານໄປສູ່ອ່າງຜ່ອນກຳລັງນ້ຳ ແລະ ຄອງເຫຼືອງແມ່;
7. ເຂດຊົນລະປະທານ ໝາຍເຖິງ ຂອບເຂດພື້ນທີ່ດິນຊົນລະປະທານ ຊຶ່ງປະກອບດ້ວຍ ທີ່ດິນຫົວງານ, ອ່າງເກັບນ້ຳ, ລະບົບຄອງເຫຼືອງ, ລະບົບຄອງລະບາຍ ແລະ ເຂດພື້ນທີ່ດິນທີ່ຊົນລະປະທານສາມາດສະໜອງນ້ຳໄດ້ ຕາມການສຶກສາ, ການສຳຫຼວດ-ອອກແບບ ໂດຍຫຼັກເຂດແດນກຳນົດໄວ້;
8. ການກໍ່ສ້າງ ແລະ ຕິດຕັ້ງ ໝາຍເຖິງ ການກໍ່ສ້າງຫົວງານ, ລະບົບຄອງເຫຼືອງ ລວມທັງການປະກອບອຸປະກອນຕ່າງໆ ເຊັ່ນ: ຈັກສູບນ້ຳ, ລະບົບໄຟຟ້າ, ເຮືອແພທີ່ສົ່ງນ້ຳ, ປະຕູນ້ຳ, ການປະກອບແຜ່ນເບຕົງສຳເລັດຮູບຕາມບັນດາຄອງເຫຼືອງ ແລະ ກິດຈະການອື່ນໆ ທີ່ພົວພັນກັບກິດຈະການຊົນລະປະທານ;
9. ການຟື້ນຟູ ໝາຍເຖິງ ການປັບປຸງ, ແກ້ໄຂສ່ວນທີ່ຊຸດໂຊມ, ເປ່ເພ ສິ່ງທີ່ສ້າງຜ່ານມາໃຫ້ຄືນສູ່ປົກກະຕິ, ສາມາດນຳໃຊ້ໄດ້ພ້ອມທັງຍົກລະດັບໃຫ້ເປັນທັນສະໄໝ ເພື່ອຂະຫຍາຍເນື້ອທີ່ຫົດຕື່ມອີກ;
10. ການສ້ອມແປງ ໝາຍເຖິງ ການປັບປຸງ, ດັດແປງແກ້ໄຂສ່ວນທີ່ເປ່ເພ ຈາກການນຳໃຊ້ ແລະ ໄພທຳມະຊາດຂອງສິ່ງກໍ່ສ້າງຊົນລະປະທານໃຫ້ກັບຄືນໃຊ້ງານໄດ້ປົກກະຕິ;
11. ການສ້ອມແປງສຸກເສີນ ໝາຍເຖິງ ການປັບປຸງ, ແກ້ໄຂສ່ວນທີ່ເປ່ເພ ຫຼື ຊຸດໂຊມຂອງສິ່ງກໍ່ສ້າງຜ່ານມາ ເປັນບາງຈຸດໃຫ້ຄືນສູ່ປົກກະຕິ ສາມາດນຳໃຊ້ໄດ້ພາຍໃນເວລາບໍ່ເກີນໜຶ່ງລະດູການຜະລິດ;
12. ການຕໍ່ເຕີມ ໝາຍເຖິງ ການຂະຫຍາຍພື້ນທີ່ຕາມການອອກແບບ ແລະ ບໍລິມາດ ຂອງສິ່ງກໍ່ສ້າງ ເຊັ່ນ: ການຍົກລະດັບສັນເຂື່ອນ, ການເພີ່ມຈັກສູບນ້ຳ, ໄດປ້ານ້ຳ, ການຂະຫຍາຍລະບົບຄອງສົ່ງນ້ຳ, ອາຄານແບ່ງນ້ຳ, ຄອງລະບາຍ ແລະ ອື່ນໆ ດ້ວຍການຫັນໄປສູ່ທັນສະໄໝ ເທື່ອລະກ້າວ;
13. ໄພພິບັດ ໝາຍເຖິງ ໄພອັນຕະລາຍເກີດຈາກທຳມະຊາດ ແລະ ການກະທຳຂອງມະນຸດ ເປັນຕົ້ນ: ລົມພາຍຸພັດ, ໝາກເຫັບຕົກ, ຟ້າຜ່າ, ນ້ຳຖ້ວມ, ໄພແຫ້ງແລ້ງ, ອາກາດໜາວຈັດ, ດິນເຈື່ອນ, ແຜ່ນດິນໄຫວ, ໄຟໄໝ້, ສັດຕູພືດທຳລາຍ, ພະຍາດລະບາດ ຊຶ່ງໄດ້ເກີດຂຶ້ນ ແລະ ສ້າງຄວາມເສຍຫາຍຕໍ່ຊັບສິນ, ເສດຖະກິດ, ສິ່ງແວດລ້ອມ;
14. ພື້ນທີ່ຮັບນ້ຳຊົນລະປະທານ ໝາຍເຖິງ ພື້ນທີ່ໄດ້ຮັບການສະໜອງນ້ຳໃຫ້ແກ່ການຜະລິດກະສິກຳ;
15. ຊົນລະກະເສດ ໝາຍເຖິງ ການຜະລິດກະເສດສຸມໃນເຂດຊົນລະປະທານ ດ້ວຍການນຳໃຊ້ເຕັກນິກວິທະຍາສາດ;
16. ຊົນລະປະທານປວງຊົນ ໝາຍເຖິງ ຊົນລະປະທານ ທີ່ປະຊາຊົນ ລວມທັງຄອບຄົວ ເປັນເຈົ້າການສ້າງຂຶ້ນເອງ ໂດຍນຳໃຊ້ວັດຖຸທ້ອງຖິ່ນ ເຊັ່ນ ກົງພັດນ້ຳ, ຝາຍໄມ້, ຝາຍກວຍຫີນ, ການນຳໃຊ້ທໍ່ເຮັດຮາງລິນ, ນຳໃຊ້ນ້ຳໃຕ້ດິນ, ໜອງ ແລະ ອື່ນໆ;
17. ການແຈກຢາຍນ້ຳຊົນລະປະທານແບບຮອບວຽນ ໝາຍເຖິງ ການແຈກຢາຍນ້ຳ ຢ່າງມີແຜນການ ແລະ ປະຢັດ ດ້ວຍການໝູນວຽນນຳໃຊ້ນ້ຳປະຈຳອາທິດ ຂອງຄອງເຫຼືອງຂັ້ນສອງແຕ່ລະເຂດ;
18. ກຸ່ມຜູ້ນຳໃຊ້ນ້ຳຊົນລະປະທານ ຂຽນຫຍໍ້: ກນຊ ໝາຍເຖິງ ການຈັດຕັ້ງຂອງຊາວກະສິກອນນຳໃຊ້ນ້ຳ ແລະ ໄດ້ຮັບຜົນປະໂຫຍດ ຈາກໂຄງການຊົນລະປະທານ ເພື່ອຄຸ້ມຄອງ ແລະ ບໍລິຫານຈັດການ;
19. ພັນທະຂອງກຸ່ມຜູ້ນຳໃຊ້ນ້ຳຊົນລະປະທານ ໝາຍເຖິງ ຄວາມຮັບຜິດຊອບຂອງສະມາຊິກກຸ່ມຜູ້ນຳໃຊ້ນ້ຳ ຕ້ອງໄດ້ປະຕິບັດຕາມລະບຽບຂອງກຸ່ມຜູ້ນຳໃຊ້ນ້ຳ ແລະ ການມອບໝາຍຂອງຄະນະບໍລິຫານກຸ່ມ.