ຂໍ້ຕົກລົງ ການຈັດຕັ້ງຜັນຂະຫຍາຍ ມະຕິຕົກລົງຂອງລັດຖະບານ ວ່າດ້ວຍນະໂຍບາຍ ແລະ ມາດຕະການແກ້ໄຂບັນຫາການຂາດແຄນຄູສອນ, ການປະລະການຮຽນ ແລະ ສົ່ງເສີມເຂົ້າຮຽນວິຊາຊີບ

ມາດຕາ ມາດຕາ 1

ມາດຕາ 1: ຜັນຂະຫຍາຍນະໂຍບາຍ ແລະ ມາດຕະການ ໃນການແກ້ໄຂບັນຫາການຂາດແຄນຄູສອນ:

1. ໃຫ້ພະແນກສຶກສາທິການ ແລະ ກິລາແຂວງ, ຫ້ອງການສຶກສາທິການ ແລະ ກິລາເມືອງ ປະສານສົມທົບອົງການປົກຄອງເມືອງ, ແນວລາວສ້າງຊາດ, ອົງການຈັດຕັ້ງມະຫາຊົນ ແລະ ຄະນະພັດທະນາການສຶກສາໃນແຕ່ລະຂັ້ນ ສືບຕໍ່ປຸກລະດົມ ແລະ ເພີ່ມທະວີການນຳພາ ສຶກສາອົບຮົມການເມືອງ-ແນວຄິດ ໃຫ້ແກ່ລັດຖະກອນຄູ ແລະ ຄູອາສາສະໝັກໃຫ້ມີຄວາມອຸ່ນອ່ຽນທຸ່ນທ່ຽງ, ມີຄວາມຮັບຜິດຊອບ ແລະ ຄວາມເສຍສະຫຼະ ໃນການປະຕິບັດໜ້າທີ່ການສິດສອນໃຫ້ຫຼາຍຂຶ້ນ ດ້ວຍຫຼາຍວິທີການທີ່ເໝາະສົມຢ່າງເລິກເຊິ່ງ, ທົ່ວເຖິງ ແລະ ແຂງແຮງກວ່າເກົ່າ;

2. ໃຫ້ພະແນກສຶກສາທິການ ແລະ ກິລາແຂວງ, ຫ້ອງການສຶກສາທິການ ແລະ ກິລາເມືອງ ເກັບກຳຂໍ້ມູນສະຖິຕິຄວາມຕ້ອງການຄູ ໃນສະຖານການສຶກສາທີ່ມີທີ່ຕັ້ງລຽບຕາມຊາຍແດນ ແລະ ເຂດທຸລະກັນດານ ບ່ອນທີ່ມີເງື່ອນໄຂນຳໃຊ້ບຸກຄະລາກອນທີ່ສັງກັດໃນພາກສ່ວນອື່ນຊ່ວຍສອນ, ພ້ອມທັງເກັບກຳຂໍ້ມູນຜູ້ທີ່ເຄີຍເປັນຄູສອນທີ່ເຮັດວຽກໃນຂະແໜງການສຶກສາ ແລະ ຂະແໜງການອື່ນ ເມື່ອພັກບຳນານແລ້ວ ແຕ່ມີຄວາມສະໝັກໃຈສືບຕໍ່ເປັນຄູສອນໃນເຂດຂາດເຂີນຄູ;

ໃຫ້ອົງການປົກຄອງເມືອງ, ກຸ່ມບ້ານ, ບ້ານ, ທຸກພາກສ່ວນໃນສັງຄົມ ຄົ້ນຄວ້າສິ່ງຈູງໃຈ ແລະ ກຳນົດມາດຕະການຊ່ວຍເຫຼືອ ລັດຖະກອນຄູ, ຄູອາສາສະໝັກ ຕາມຄວາມເໝາະສົມ ເປັນຕົ້ນທີ່ພັກອາໄສ, ເບິ່ງແຍງຊີວິດການເປັນຢູ່, ນະໂຍບາຍອື່ນໆ ຕາມຄວາມສາມາດ ແລະ ເງື່ອນໄຂຕົວຈິງຂອງແຕ່ລະທ້ອງຖິ່ນ;

ໃຫ້ພະແນກສຶກສາທິການ ແລະ ກິລາແຂວງ ເກັບກຳຂໍ້ມູນສະຖິຕິຄູອາສາສະໝັກ ທີ່ມີຄວາມຕ້ອງການ ແລະ ຈຳເປັນໃນແຕ່ລະຊັ້ນ, ແຕ່ລະສາຍ ແລະ ລາຍວິຊາ ໂດຍຢັ້ງຢືນຈາກພະແນກພາຍໃນ ແລ້ວສົ່ງໃຫ້ກົມຈັດຕັ້ງ ແລະ ພະນັກງານກະຊວງສຶກສາທິການ ແລະ ກິລາ;

ໃນແຕ່ລະເມືອງ, ສະຖານການສຶກສາທີ່ມີການຂາດແຄນຄູ ແມ່ນບໍ່ອະນຸຍາດໃຫ້ລັດຖະກອນຄູຍົກຍ້າຍໄປຂະແໜງການອື່ນ, ຖ້າມີຄວາມຈຳເປັນ ກ່ອນຈະມີການຍົກຍ້າຍຕ້ອງສະເໜີເຖິງ ກະຊວງສຶກສາທິການ ແລະ ກິລາ ພິຈາລະນາອະນຸມັດສະກ່ອນຈຶ່ງຍົກຍ້າຍໄດ້;

ພະແນກສຶກສາທິການ ແລະ ກິລາ ປະສານສົມທົບ ພະແນກພາຍໃນ ເພື່ອຄົ້ນຄວ້າ ແລະ ປຶກສາຫາລືກ່ຽວກັບການຫັນເປັນພະລະກອນຄູ ແລະ ການທົດແທນຄູສູນເສຍໃນຮູບການຕ່າງໆ;

ໃຫ້ພະແນກສຶກສາທິການ ແລະ ກິລາແຂວງ, ຫ້ອງການສຶກສາທິການ ແລະ ກິລາເມືອງ ສົມທົບກັບອົງການປົກຄອງເມືອງ, ກຸ່ມບ້ານ, ບ້ານ ຄົ້ນຄວ້າການຍຸບຂັ້ນຮຽນ ແລະ ໂຮມໂຮງຮຽນຂະໜາດນ້ອຍ ບ່ອນທີ່ມີເງື່ອນໄຂເຂົ້າກັນ ແລະ ສືບຕໍ່ສ້າງຕັ້ງ, ປັບປຸງກຸ່ມໂຮງຮຽນປະຖົມ ແລະ ມັດທະຍົມ ເພື່ອຊ່ວຍເຫຼືອເຊິ່ງກັນ ແລະ ກັນທາງດ້ານວິຊາການ ແລະ ແກ້ໄຂບັນຫາການຂາດແຄນຄູໃນສະເພາະໜ້າ.