ຄຳແນະນຳ ວ່າດ້ວຍການແກ້ໄຂຂໍ້ຂັດແຍ່ງທາງດ້ານເສດຖະກິດ ຢູ່ພະແນກຍຸຕິທຳ ແຂວງຫຼວງນ້ຳທາ

ມາດຕາ 1

ການແກ້ໄຂຂໍ້ຂັດແຍ່ງທາງເສດຖະກິດ: — ອົງການແກ້ໄຂຂໍ້ຂັດແຍ່ງທາງເສດຖະກິດແມ່ນອົງການຈັດຕັ້ງຂອງລັດ, ມີລັກສະນະສັງຄົມອາຊີບ ແລະ ກົດໝາຍ, ຢູ່ພາຍໃຕ້ການຄຸ້ມຄອງຂອງອົງການຕຸລາການ, ໜ້າທີ່ຂອງຕົນແມ່ນການສ້າງເງື່ອນໄຂ ແລະ ອຳນວຍຄວາມສະດວກໃຫ້ແກ່ຄູ່ກະທຳ, ຜູ້ໄກ່ເກ່ຍ ແລະ ຄະນະກຳມະການຕັດສິນໃນການດຳເນີນການແກ້ໄຂຂໍ້ຂັດແຍ່ງທາງເສດຖະກິດ. — ເພື່ອຮັບມືກັບຂໍ້ຂັດແຍ່ງທີ່ອາດເກີດຂຶ້ນໃນຂະບວນການດຳເນີນທຸລະກິດ, ແລະ ເຮັດໃຫ້ພໍ່ຄ້າມີຄວາມເຊື່ອໝັ້ນໃນການແກ້ໄຂຂໍ້ຂັດແຍ່ງ, ໂດຍແນ່ໃຈວ່າຈະບໍ່ມີການແຊກແຊງຈາກອຳນາດລັດ. ຖ້າຫາກຟ້ອງຮ້ອງຕໍ່ສານ, ຈະສົ່ງຜົນກະທົບຕໍ່ຊື່ສຽງ, ເສຍເວລາໃນການດຳເນີນທຸລະກິດ, ແລະ ທີ່ສຳຄັນແມ່ນສານຈະໃຊ້ອຳນາດລັດຕັດສິນທຸກບັນຫາ. — ເພື່ອເຮັດໃຫ້ນັກລົງທຶນຕ່າງປະເທດມີຄວາມເຊື່ອໝັ້ນຕໍ່ລະບົບການບໍລິຫານ ແລະ ລະບົບກົດໝາຍຂອງ ສາທາລະນະລັດ ປະຊາທິປະໄຕ ປະຊາຊົນລາວ. — ເພື່ອແກ້ໄຂຂໍ້ຂັດແຍ່ງລະຫວ່າງຄູ່ກະທຳດ້ວຍວິທີສັນຕິ, ຍຸຕິທຳ ແລະ ວ່ອງໄວ, ເຮັດໃຫ້ບັນຫາທີ່ຂັດແຍ່ງກັນ ຫຼື ບໍ່ລົງລອຍກັນສິ້ນສຸດລົງດ້ວຍຄວາມເພິ່ງພໍໃຈຂອງຄູ່ກະທຳ, ໂດຍບໍ່ມີການລຳອຽງໃຫ້ຝ່າຍໃດຝ່າຍໜຶ່ງ, ແລະ ບໍ່ຊັກຊ້າເວລາ. — ເພື່ອຟື້ນຟູສິດ ແລະ ຜົນປະໂຫຍດທີ່ຖືກລະເມີດ, ຄື: ການແກ້ໄຂຂໍ້ຂັດແຍ່ງທາງເສດຖະກິດມີຈຸດປະສົງເພື່ອຕິດຕາມເອົາຄືນ, ຟື້ນຟູສິດ ແລະ ຜົນປະໂຫຍດໃຫ້ແກ່ຄູ່ກະທຳຝ່າຍທີ່ເສຍຫາຍ, ແລະ ເຮັດໃຫ້ສັງຄົມມີຄວາມເປັນລະບຽບຮຽບຮ້ອຍ ແລະ ສະຫງົບສຸກ.