ຄຳສັ່ງ ວ່າດ້ວຍການເພີ່ມທະວີຄວາມເອົາໃຈໃສ່ຕໍ່ວຽກງານທະບຽນສານ

ມາດຕາ 1

ສັ່ງໃຫ້ບັນດາພະແນກການ, ອົງການຈັດຕັ້ງທຽບເທົ່າ, ອົງການຈັດຕັ້ງແນວລາວສ້າງຊາດ, ອົງການຈັດຕັ້ງມະຫາຊົນ, ກອງບັນຊາການກອງທັບປະຊາຊົນ-ຕຳຫຼວດ, ທ່ານເຈົ້າເມືອງ, ເລຂາທິການສະພາປະຊາຊົນແຂວງ, ວິສາຫະກິດຂອງລັດ, ຕະຫຼອດຮອດບັນດາພໍ່ແມ່ປະຊາຊົນ ແລະ ພົນລະເມືອງທັງໝົດໃນເຂດແຂວງຜົ້ງສາລີ, ໃຫ້ນຳເອົາສັນຍາ ແລະ ເອກະສານຕ່າງໆ ໄປສົ່ງໃຫ້ພະແນກຍຸຕິທຳແຂວງ (ຫ້ອງການຈົດທະບຽນສັນຍາ) ຫຼື ຫ້ອງການຍຸຕິທຳເມືອງ (ໜ່ວຍງານຈົດທະບຽນສັນຍາເມືອງ) ເພື່ອກວດສອບຄວາມຖືກຕ້ອງທາງກົດໝາຍ, ຈຶ່ງຈະຖືເປັນສັນຍາ ຫຼື ເອກະສານທີ່ຖືກຕ້ອງຕາມກົດໝາຍ, ສອດຄ່ອງ ແລະ ມີຜົນບັງຄັບໃຊ້ທາງກົດໝາຍ, ເຊິ່ງລວມມີ:
1.1 ສັນຍາຕ່າງໆ ເຊັ່ນ: ສັນຍາສຳປະທານ, ສັນຍາຮັບເໝົາກໍ່ສ້າງ, ສັນຍາຊື້ຂາຍ, ສັນຍາກູ້ຢືມ, ສັນຍາເຊົ່າ, ສັນຍາຂົນສົ່ງ, ສັນຍາຮ່ວມທຶນ, ສັນຍາມອບຊັບສິນ, ສັນຍາແຮງງານ ແລະ ອື່ນໆ;
1.2 ສັນຍາ ແລະ ການກະທຳທາງກົດໝາຍກ່ຽວກັບການປ່ຽນແປງສິດນຳໃຊ້ທີ່ດິນ ແລະ ການໂອນສິດນຳໃຊ້ທີ່ດິນ ເຊັ່ນ: ການຮັບມໍລະດົກຕາມກົດໝາຍ ແລະ ຕາມພິນັຍກຳ, ສັນຍາຊື້ຂາຍສິດນຳໃຊ້ທີ່ດິນ, ສັນຍາແລກປ່ຽນ, ສັນຍາຈຳນຳ (ຂາຍຝາກ), ສັນຍານຳເອົາທີ່ດິນ ແລະ ເຮືອນເປັນຫຸ້ນ, ການຍຶດຊັບສິນແບບບັງຄັບໃນກໍລະນີຈຳເປັນ, ການຍຶດຊັບສິນ, ການມອບ-ໂອນຊັບສິນ (ກ່ຽວຂ້ອງກັບທີ່ດິນ), ສັນຍາເຊົ່າ, ສັນຍາຄ້ຳປະກັນ, ການສືບທອດສິດ (ໃນສັນຍາເຊົ່າ, ສັນຍາຄ້ຳປະກັນ, ສັນຍາຈຳນຳ), ຄຳສັ່ງບັງຄັບໃຊ້ຄຳພິພາກສາຂອງສານ ແລະ ອື່ນໆ;
2.3 ພິນັຍກຳ, ສິດຄອບຄອງຊັບສິນຮ່ວມຂອງຜົວເມຍ ຫຼື ຊັບສິນເດີມ, ສຳເນົາເອກະສານ, ລາຍເຊັນ ຫຼື ລາຍນິ້ວມື, ການແປ, ການປຽບທຽບຕົວຈິງກັບຮູບຖ່າຍ, ວັນທີຢັ້ງຢືນເອກະສານ, ການຮັບເອກະສານທີ່ກ່ຽວຂ້ອງກັບການຢັ້ງຢືນ, ເອກະສານອື່ນໆ.